УУЛЫН УЛАДАЙ УУЛЗАЛГЫН БАЯР
Үнгэрэгшэ долооной эсэстэ аглаг үндэр Аха нютагта хонгоодор угсаатанай ээлжээтэ һайндэр боложо үнгэрбэ.
Аха, Түнхэн, Алайр, Захааминай ахамад үеын сэсэн, мэргэн хүтэлбэрилэгшэд, холын хараа бодолтой эдэбхитэдэй эблэрэн һуугаад, эбээрээ хэлсэжэ эхилэн зохёоһон “Уулын уладай уулзалга” гэжэ алдаршаһан энэ найрай анха түрүүшынхиеэ боложо үнгэрһөөр гушаад жэлэй гүйсэхэ саг дүтэлэнхэй.
Ээлжээн тудажа, эбтэйгээр суглараа
Арбан хоёрдохиёо эмхидхэгдэһэн энэ уулзалга ээлжээнэй ёһоор Буряадаймнай эгээл баруун — урда зүгтэ оршодог Аха үндэр аймагай үзэсхэлэнтэ һайхан газар дээрэ үнгэрбэ гээшэл даа. Уласаймнай гурбан аймагай найр үнгэргэжэ байһан аглаг үндэр Ахын, заха холын Захааминай, түхэреэн сагаан Түнхэнэй, гадна Эрхүү можын Усть-Ордын Буряад тойрогой талаар дүүрэн таряатай Алайр баян аймагай, мүн тиихэдэ Монгол сайхан ороной Хүбсэгэл аймагай Ханх сомоной түлөөлэгшэд уулзалгада хабаадалсаа. Соёлой, спортын зүйлнүүдээр үнгэргэгдэһэн мүрысөөнүүдтэ хабаадалсаха залуушуул, аймагуудые хүтэлжэ байгаа дарганар, угтан абажа байгаа аймагайнгаа амжалтануудые адаглаха, хэрэгтэйдэ тоолоһон дүй дүршэлыень хадуун абаха зорилготойгоор ерэһэнээ айлшад сэхэ мэдүүлнэ һэн. Энэл гүб даа, ээлжээтэ уулзалгын эгээл шухала зорилгонь!
Ерэхэ, ошохо харгын саг тоолоходо, дүрбэн хоногой туршада ехэ найр наярһан байха юм. Ахын зон хүлтэ гартаараа бодожо, олон тоото эмхи зургаанууд, сомонуудай ажаһуугшад ерэһэн айлшадые ямбалан хүндэлхэ гэжэ оролдоо. Аймагай засагай байгуулһан эмхидхэлэй хорооной хэһэн ажал эли тодоор зоной хёрхо нюдэндэ харагдаһан байха. Һайхан заншалаа алдангүй, һайнаар лэ айлшадаа угтаха, тэдэндээ аймаг нютагаа, арад зоноо, ажабайдалаа харуулха гэһэн бодол баримталһаниинь һайшаалтай.
Дүхэриг шэрээдэ үхибүүд олон байгаа
Һайн хаанай һамаргаанаар, Бушагта хаанай буһалгаанаар Алтай хангайгаа дабажа, Зүүн Саяанай мантан хадануудай боорёор тогтожо байрлаһан, хабсагай шулуу, тайга шэлэ гаталжа, баруун таладань гарахадаа, баян гэгшын Алайрай талаар таража һууһан хонгоодорнуудай холын түүхэ, ехэ гарбал тухай мэдээсэл “Монголой нюуса тобшоһоо” захалаад, угай бусад бэшэгүүдтэ, түүхэшэ эрдэмтэдэй хүдэлмэринүүдтэ тоогүй оло дахин дабтагдаһан ааб даа.
“Аха – ахамад бурхашуулай орон нютаг” гэһэн ниитэ гаршаг доро дүхэриг шэрээ уулзалгын баярай түрүүшын үдэр Өөрлиг тосхондо эмхидхэгдэжэ, Аха аймагай һургуулинуудай шабинар олоор хабаадалсаа. Уула хадануудай эзэдтэ шүтэн мүргэхэ урданай ёһо заншалһаа эхилээд, нютагайнгаа суута хүнүүд, хүгжэлтын түүхэ, соёл, болбосорол тухай элидхэлнүүдые эдир эрдэмтэд сугларагшадай анхаралда дурадхаа.
Ехэшүүлэй ехэ бодолнууд
Алайрһаа айлшаар бууһан багша Зоя Жабадаева өөрынгөө элидхэл соо угсаата зонойнгоо уулзалгануудта Алайрай хонгоодорнуудай хабаадаһан тухай ехэ һонирхолтойгоор хөөрөө.
Аха аймагай эрдэмэй гуламтануудай хүтэлбэрилэгшэд – Саяанай һургуулиин захирал Артемида Сайбанова, Өөрлигэй һургуулиин захиралай орлогшо Алексей Папаев гэгшэд мүн лэ гүнзэгы удхатай элидхэлнүүдые хэжэ, бултанай һайшаалда хүртэһэн байха юм.
Холын хойто зүгэй үсөөн тоото үндэһэн арадуудай эблэлэй хүтэлбэрилэгшэ, Ахын түүхэтэ “Пунцогнамдоллинг” дасанай шэрээтэ Данзан-Норбу Аюшеев, Москва хотоһоо айлшаар бууһан хонгоодор угсаатанай түлөөлэгшэ, эрдэмтэн, уласхоорондын харилсаануудай Россиин эблэлэй нютагай олониитые хүгжөөхэ талаар шэглэлэй хүтэлбэрилэгшэ Анна Вахрунова гэгшэд амаршалгын үгэ хэлэхэдээ, хүн түрэлтэнэй хүгжэлтын асуудалнууд дээрэ тогтоһон байха юм. Яараһан сагай яаха аргагүй ошохо бүри хүн бүхэн, угсаата арад бүхэн өөрынгөө хуби заяан, алтан дэлхэй дээрэ ажамидархадаа, үгтэһэн энэ наһандаа хэхэ ажал, бэелүүлхэ үүргэеэ зүбөөр ойлгожо, оршон тойронхи эхэ байгаалитаяа, хүршэ ажаһууһан хүнүүдтэеэ, арад зонтоёо үгэ нэгэтэй байха шухала гэжэ онсолоо.
Һүүлэй үедэ манай Буряад орондо, хонгоодор угсаатанай хэр угһаа эзэлжэ ажаһуудаг газар дэбисхэртэ онсо анхарал хандуулагдадаг болонхой. Алдарта Байгал далай, дуулгата үндэр Саяан уула, хүбшэ тайга, сэбэр агаар, сэнхир тунгалаг гол, мүрэнүүд олон тоото аяншалагшадай анхарал эзэлүүдгүй татаха юм. Иимэ оршон байдалда нютаг дээрэ ажамидаржа, ажал хэжэ, ажабайдалаа зохёожо байгаа улад зоной ерээдүй ямар бэ? Үри хүүгэд ямар эрдэм оложо, али мэргэжэлээр ажал хэбэл, хоолойгоо ганса тэжээхэ бэшэ, хотон айлдаа туһатай, арад түмэндөө ашагтай байхаб? Тоонто нютагайнгаа, гүрэн түрынгөө түлөө харюусалга өөр дээрэ даажа абахадаа, бүхэ голтой, бүргэд хурса нюдэтэй, газар шэхэтэй амитанһаа үлүү һонор байжа шадаха гү? Гадаадыншье, дотоодыншье дайсадта эсэргүүсэжэ, эхэ газараа, элинсэг хулинсагайнгаа заяаһан зан заншал, хэлэ соёл, эрдэм ухаа саашанхи үенүүдтээ сахин дамжуулха шадалтай шэнэ үе, залуу халаан бэлдэхэ тухай бодохо хэрэгтэй гэжэ дүхэриг шэрээдэ сугларагшад онсолоо.
Аха аймагай засаг дарга Матвей Мадасов, һунгамалнуудай Зүблэлэй түрүүлэгшэ Мүнхэ-Жаргал Ошоров дүхэриг шэрээдэ хабаадагшадта хандажа, баярай үгэнүүдые хэлээ. Холо ойроһоо бууһан айлшад, дарга ноёд, тодорхойлбол, Буряад Уласай Засагай газарай Түрүүлэгшын орлогшо Евгений Луковников, Алайр аймагай засаг дарга Александр Футорный, Дүүмын түрүүлэгшэ Роман Тумуров, Монгол Уласай Хүбсэгэл аймагай Ханх сомоной Хуралай дарга Лобсан Дуламхуу, засаг даргын орлогшо Энхболд Амарсанаа болон бусад мүн лэ сугларагшадта хандажа, уулын уладай уулзалгын удха шанарай гүнзэгые, тэрэниие зохёон байгуулһан зоной холын хараа бодол, угсаата зоной эб нүхэсэлые магтан, омогорхон тэмдэглээ.
Добавить комментарий
Добавлять комментарии могут только зарегистрированные и авторизованные пользователи.